Matthew 6
Di agoago o di hagamaamaa
1“Goodou hudee hai hegau daumaha ngudu golomada. Maa goodou ga hai beenei, gei goodou e deemee di kae godou hui mai baahi Tamana i di langi. a 2Maa goe ga wanga dau mee gi tangada hagaloale, hudee haga iloo ina be digau ala e hai hegau ngudu golomada i lodo nia hale daumaha mo i hongo nia ala, bolo gi hagaamu ginaadou go nia daangada. Au e hagi adu gi goodou bolo digau aanei la gu lawa di kae nadau hui. 3Malaa, doo madagoaa ma ga hagamaamaa tangada hagaloale, hagamaamaa ina gi di hai dela e de iloo tangada. 4Dau hagamaamaa la gi de modongoohia. Tamana i di langi e iloo nia mee ala e hagammuni, ga dugu adu laa doo hui.Di agoago di hai dalodalo
(Luke 11.2-4)
5“Maa goe ga dalodalo, hudee hai be digau hai hegau ngudu golomada ala e hiihai e tuu aga, e dalodalo i lodo nia hale daumaha, be i nia buu nia ala, bolo gi mmada ginai digau dogologo. Gei au e hagi adu gi goodou di tonu, bolo digaula la gu lawa di kae nadau hui. b 6Doo madagoaa ma ga dalodalo, hana gi lodo doo ruum, haidia, dalodalo ang gi doo Damana i di gowaa dela e deemee di gidee, gei mee ga gidee au mee ala e hai modogoe, gei mee ga dugu adu laa doo hui. 7Maa goe ga dalodalo, hudee hai hegau i nia balu helekai e logo, be digau ala digi maalama, ala e hagamamaanadu bolo God ga hila anga laa gi ginaadou mai nadau dalodalo lloo ehaa. 8Goodou hudee hai be digaula. Tamana i di langi gu iloo ia nia mee ala hagalee dohu i godou baahi i mua di godou tangi ang gi mee. 9Malaa, e hai beenei go di godou hai e dalodalo ai:Di madau Damana dela i di langi,
doo ingoo gi dabuaahia,
10doo Henua gi dau mai,
doo manawa gi gila i henuailala, gi hai be doo hai i di langi.
11Gaamai madau meegai gi humalia mai gi gimaadou dangi nei.
12Weedee madau ihala la gi daha,
gi hai be gimaadou ala e dumaalia gi nia hala o digau ala ne hai mai gi gimaadou.
13Hudee dugua anga gimaadou gi nia hagamada.
Dahia adu gimaadou gi daha mo nia huaidu.
[Idimaa, ni aau go doo Henua,
di mogobuna, mo di madamada,
ga hana hua beelaa. Amen.]
14Maa goodou ga dumaalia gi nia hala o digau ne hai adu gi goodou, Tamana di langi la ga dumaalia labelaa adu gi goodou. c 15Maa goodou hagalee dumaalia ang gi digau ala i golo i nadau hai hala, gei Tamana hagalee dumaalia adu gi godou hai hala.
Di agoago o di hagaonge
16“Di madagoaa e hagaonge ai goodou, goodou hudee hai golomada lodo huaidu be digau hai hegau ngudu golomada ala e hai nia daangada gi iloo bolo ginaadou e hagaonge. Au e hagi adu gi goodou di tonu bolo digaula gu lawa di kae nadau hui. 17Maa goe ga hagaonge, gaugaulia oo golomada, dala ina doo libogo, 18gei nia daangada ga de iloo bolo goe e hagaonge, gei Tamana i di gowaa e deemee di gidee, e iloo ia. Tamana e iloo ia au hegau huogodoo hagammuni, ga dugu adu laa doo hui.Nia maluagina di langi
(Luke 12.33,34)
19“Hudee benabena ina godou maluagina henuailala ala e tomo, gei e gai go hiingodo, gei digau gaiaa e loomoi e oho nia hale, e gaiaa. d 20Gi hagamahi gi hagabudu ina godou maluagina i di langi ala hagalee ngudu, hagalee gai go hingodo, gei digau gaiaa e deemee di oho nia hale, e gaiaa. 21Idimaa, di gowaa dela iai doo maluagina, deelaa di gowaa e haa manawa iei goe.Di haga maalama tuaidina
(Luke 11.34-36)
22“Nia golomada le e hai be di malama e haga maalama tuaidina. Maa oo golomada le e humalia, gei doo huaidina le e honu di maalama. 23Gei oo golomada ga hagalee humalia, gei doo huaidina le e honu di bouli. Maa di maalama i oo lodo la di bouli, e huaidu huoloo e bouli dongoeho!God mo nia goloo henuailala
(Luke 16.13; 12.22-31)
24“Tangada e mee di hege gi nia dagi dogolua ai. Mee ga de hiihai gi tangada e dahi, ga hiihai gi tangada dela i golo. Mee ga manawa dahi gi tangada e dahi, tangada dela i golo la ga haga balumee. Deenei laa, goodou e deemee di hai hegau gi God mo nia bahihadu. 25Deelaa laa, au e hagi adu gi goodou gi hudee boo godou lodo gi nia meegai mo nia wai ang gi godou mouli, be goodou e gahu gi di aha. Malaa, e hai behee: di mouli la hagalee koia e hagalabagau i nia meegai? Tuaidina la hagalee koia e hagalabagau i nia gahu? 26Mmada gi nia manu mamaangi. Digaula hagalee dogi nadau lii, hagalee hadi nadau meegai, hagalee benebene nadau mee. Tamana di langi e benebene digaula. Malaa e hai behee: goodou hagalee koia e hagalabagau i nia manu? 27Ma koai e mee di haga waalooloo dono mouli i dono de nnoomaalia? 28Goodou e aha ala e de nnoomaalia e hagamamaanadu nia gahu? Goodou mmada gi nia daladala lodo henua e tomo aga. Nia maa hagalee ngalua be e bida hai nadau gahu. 29Gei au e hagi adu gi goodou bolo Solomon i dono madagoaa nogo maluagina ai, mee digi ulu ono gahu madamada be nia daladala aanei. e 30Ma go God dela e haga madamada nia geinga lodo henua dangi nei, gei daiaa ga kili gi lodo di ahi. Malaa e hai behee: mee hagalee ga haga gahu goodou hagahumalia i dana benebene nia mee aanei? Godou hagadonu le e lligi loo! 31Goodou hudee de nnoomaalia: gimaadou ga gaamai madau meegai mo madau wai, be go madau gahu i hee? 32Digau digi maalama e haa manawa, e halahala nia mee aanei huogodoo. Di godou Damana di langi e iloo ia nia mee huogodoo ala dee dohu i godou baahi. 33Malaa, goodou halahala ina i mua Tenua o God mo dono hiihai, gei nia mee huogodoo ala i golo, ga dugu adu gi goodou. 34Deenei laa, goodou hudee manawa gee, hudee maanadu ina daiaa, idimaa, daiaa mo ono haingadaa. Nia laangi huogodoo mo nadau haingadaa.
Copyright information for
KPG